Soinubila egitasmoarekin ikasleak herri ondare materiala eta immateriala

biltzera, katalogatzera eta honen inguruan hausnartzera bultzatu nahi ditugu.

Herri-musikaren bilketa zer den eta nondik has litekeen azalduko dugu eta ondare materialaren eta immaterialaren arteko ezberdintasunak aurkeztuko ditugu.

Bigarren Hezkuntzako ikasleei eskainia da. Maila bakoitzean ikasleen ezagutza eta gaitasunak ezberdinak direnez, ekintzaren planteamendua malgua eta moldagarria izando da.

Ikastetxetan gauzatuko dugun egitasmoak saio bakoitzean fase ezberdinak izando ditu:

1- Soinu-tresnen sailkapen zientifikoa. Galdetegi baten

laguntzaz, denen artean herrian/auzoan aurki ditzakegun soinu-tresnen mapa

osatuko dugu; mapa horri une oro elementu berriak gehitu ahal izango dizkiogu.

Ondare immaterialaren gaia problematizatuko dugu. Ahotsa ez al da soinutresna? Kantua nola jaso daiteke? Eta dantza? Saio honetan elementu

materialak eta immaterialak nola jaso eta katalogatu daitezkeen eztabaidatuko

dugu. Katalogazio fitxa eredu bat adostuko dugu, ikasleek bilketa lanerako

oinarri bat izan dezaten.

2- Galdeketa. Ikasle bakoitzak etxean edo inguruan galdetuko du, familian

edo auzoan pertsona edo elkarteren batek soinu-tresnarik baduen, kanturik edo

dantzarik badakien. Talde txikietan nork bere aurkikuntzak konpartituko ditu, eta

talde bakoitzak elementu material bat eta immaterial bat aukeratuko ditu

proiektuan zehar katalogatzeko. Kultura desberdinetako elementuak eta publiko

zabalarentzat ezezagunak izan daitezkeenak aukeratzea hobetsiko dugu.

Informatzaileengana nola gerturatu eztabaidatuko dugu. Zer galdetuko diegun,

ondarea nola bilduko dugun, biltzen duguna sarean hedatzeko baimena idatziz

jasoko dugun eta abar hausnartuko dugu. Saio bakoitzean talde bakoitzak bere

aurrerapausoak eta zailtasunak konpartituko ditu.

3- Aurkezpena. Talde bakoitzak bildutako ondareari buruzko aurkezpena egingo du, ikastetxean bertan edo herrian. Borondaterik badago, ikasleek bildutakoa plataforma digital batera igoko da, ikastetxearen web orrialdera edo Youtubeko kanalera, Soinuenearen errepositoriora edo egokia izan daitekeen beste batera.